Kosići
 

Sidin litos pod suncobran pri Šest bofori i čujen čovika di govori da su naš gradonačelnik, onda Bandić u Zagreb i Kerum u Split došli iz sela. I viče čovik kako ne znaju ovo, ne razumu ono, pa kako hi vaja vratit u sela kraj štala da tamo bleju jerbo ništa ne znaju.

Je Mirko doša iz sela, samo nisan vidi da traktoron gre po plokatu, Kerum ne vodi ovce po rivu, a Bandić ne bleji na Zagrepčane. I tako da se nebi baš u svemu složi sa meni sinpatičnin čovikon, ma stvar je u temu da se vaja prilagodit i prihvatit sredinu u koju živiš oli zapovidaš.

Sićan se mirakula što mi se dogodi ka san krajen šešdesetih živi u Metropolu. Jedan san dan ćapa zračnu pušku, poša pod mirogojsku šumu i spara u dva tri kosa. Susidi su odma podivjali i proglasili me pravin divjakon iz Korčule. Ne može se  živi u Zagreb, hodi okolo i sparavat u ptice pjevice  i to kose. Tih godišć san dobro bi pasa da nisan završi u Remetinec, oli na Goli. Evo naš gradonačelnik ne sparaje u kose, ali nan zato već godišćima napinje pločice.
 
Gradonačelnik se nika ni prilagodi životu u Korčulu, nego nan senpre napinje pločice u koje smo se ćapali ko pravi kosi, tako da nan još viru samo dva tri pera.
Već treći mandat sa svojin sekretarima gre po Korčulu sidi u Općinu a ni učini ništa. Prvo ni olavija uredi promet po gradu, drugo ni ni taka Gradski muzej i palaču Arneri. Onda je krivon ruton učini obilaznicu priko Žrnova, a kuću Marka Pola ni triba kupit nego je pravnin puten dobit. Sad nan je friško nape pločicu što dopušća da Noćno poduzeće prodaje hotel Korčulu, misto da izvrti dokumentaciju i oti hotel zapiše u vlasništvo grada Korčule. Ne znan kako su to As Vlaški i Mrša upisali tu nekretninu u vlasništvo Noćnega a da naš Mirko to u katastar ni zaviri.
 
Ne kani skoro prigledat ni dokumentaciju oko Arsenala, koja je na šijavicu pripala Obrvanu mada je pokojan Pero Tedeski reka da se Gradina nikad ni uknjižila na otu nekretninu. Ko će ga znat što je tu bilo i još ka se sitin da je oti predmet vodi As Pametni, sve je odma jasno. Svakako je red napomenut da nan je drug gradonačelnik nape puno, puno pločica među koje vaja uvrsti i predivnu šetnicu izagrada, onda Pičina punkt, a gradsku plažu da ne govorin. Na sve ove i puno drugih pločica koje radi štednje karte ne spominjen, Korčulani se nisu navadili i deboto hi ni briga, ali stabilno biračko tilo koje klika glasove našemu Mirkotu je olavija navađeno na njegova dila.
 
Da je tako govori i zadnje predavanje o drugu Titu za kojega je Ivo Banac dobrano zabrinut. Učinit i poduprit predavanje o jednemu diktatoru, koljaču i ridikulu znači Korčulanima napet taku pločicu da se može re kako in je ni sedandesetih nisu napeli praksisovci Kangrga, Marković, From, Markuze i Stojanović. Ma može li ta Litnja škola o kulture po na njuferijadu u Ponikve, oli da recimo gredu batit litnju fjaku na Bisače. Bilo bi boje da se učinilo predavanje o novinarskin dosezima Ante Panjkote, o njegovin komentarima na televiziju koji su antologija hrvatskega novinarstva, oli recimo predavanje o Sivemu Tonetu ili Mutotu. A što ne? Privuklo bi puno više čejadi nego ćapavat Korčulane pod pločicu organizirajući predavanje o Titotu. Meni je to malo čaknuto i ebete.
 
I tako sudeći po zadnjin događanjima u Korčulu moglo bi se reć da na scenu dohodu slidbenici skule po šumama i gorama. Kad se iz gora kalaju ugrad gradonačelnik i sekretari će uglas zakantat onu našu korčulansku. Ništa nova ništa novaaaaa.   
 
Slobodan Suncobran, 16. rujna 2011.