Ma meni je oni Danko Končar više dokokota. Hoće kupit škvere, pa neće, onda ovega bi, onega nebi, koda na rotondu pribire kupus i pamidore. A teško je skontat ko ga financira i podmazije, to je onako malo teže zakjučit, budući da čovik ima biografiju ko pokojni Đimi Kalođera, oli malo boju. A moran re, poduši krasi ga lipa čunka i nadasve topli pogled. Hoću reć vidi se pun je jubavi za naše škvere. E, ali biografija mu ne govori da je rabota na ingleški pantograf u Južnu Afriku di je u nacrt odavna bila prikrižena hrvatska brodogradnja.

Sva gungula oko njega i nadređene mu londonske filharmonije me posića na jedan škerac što san ga doživi prošlu godinu pri hrvatski Brodarski institut. Bi san tamo u kratki đir i ka je tribalo po ća, palo mi je napamet pitat diretura jedno lipo pitanje. Govorin mu kako se u brode puno ne razumin, ma dohodin iz grada brodogradnje pa nikega vraga i znan, a i bome struga san ruzinu na škver četiripe godišć.

Dakle, pitan ga kako to da je ovi Brodarski institut među pet najcinjenijih na svitu, brodogradnja nan je bila druga u svitu i oduvik je činila kvalitetne brode, onda za prošlu godinu smo od Amerikani za jednu vrst broda dobili prestižnu svitsku nagradu za najboji brod, a iz Brisela nan poručiju da će vajat zatvorit škvere, oli hi ferma poticat. Odma se umiša direturov zaminik, oli tajnik(što ja znan) i dopuni me kako smo mi u tu godinu za deset vrsti brodi dobili svitske nagrade, a ne za jedan. Ja blenu ko Rip Kirbi bez oćali i ne virujen što čujen, ali kad je diretur ćapa zraka i poče mi tumačit o čemu se radi, doša mi je kolap. On je u par minuti izgovori taku demagogiju da je boje ode to ne pisat. Poša san doma u čudu i odma nazva rojaka Borisa što je puno godišć rabota u Brodarski institut i sve mu ispripovidi. On mi je samo reka; zaboravi, to su ti naša posla.

Sićan se krajen prošle i početkon ove smo isporučili Norveđinima jedan specijalni brod iz Uljanika i jedan za Švede iz Rijeke i ope hi hvalu kako najboje, pa mi ni jasno zašto ti Šveđani i Norveđini ne dadu te brode čini u Samsunga kad su oni jeftiniji i boji. E tu mi ni jasan odgovor i o čemu se radi, ali možebi da smo mi isto morali kala cinu pa ispada da učinimo Mercedes, a moramo ga proda za cinu o Golfa. Ala dobro, svi znamo da su međunarodni industrijski truti zavrgli solde na istok di in za šaku dolori činu puno jeftinije brode, a ove skupe radnike u Europu izvrgli na put, ali ova ćakula o škverima bila bi šupja da se ne završi u Korčulu, koljevku hrvatske brodogradnje.

Mi jedini na svitu imamo škver koji je promini toliko imena. Prvo je bi Ivan Cetinić, pa Brodograditelj, onda Inkobrod i ka je uzadnju počela zajebancija, peta je ime Leda. Evo i sa mi javjaju moji suncobrani da će peta ime Peters. Ali Leda se u svomu programu vratila činit brode ko u vrime Iliri. Ništa oprema i tehnologija. Čini se samo ludo gozje. A dobro, ćapa štogo, bar u škver više ni partije i komesari ni radničkega savjeta. I što san hoti reć, e to za Ledu, nju siguro Brisel neće zatvorit, a bome ni Končar je ne misli kupit, jedino što bi bilo dobro a to je da ona dobro poznata ekipa ope ne užeže konver.

E i sad je Linić ču od mene da je ovi Končar zajebant u službi njezinega veličanstva i reka je da mu neće dat Treći maja. Ma bravo moj Liniću dobro si se obada od tega uhjana, a ja bi pridloži neka sve škvere da Korčulanima. Mi bi in odma svima prominili imena i nijedan nebi bi u krizu. Činili bi se najboji brodi, jer kako mi Korčulani brodimo to ne more niko. Imamo na škoju tri škvera a u cilu državu ne mogu olavija rabotat tri. Ni nan Tito 1963. u Korčulu slučajno da činit jahtu Podgorku. To je bila brodina za koju je nacrt bi učinjen u dubokon podzemlju SKJ i taku jahtu nijedan diktator ni sanja. Zapravo cilo vrime hoću re kako bi sve što gre štranbo tribalo pridat Korčulanima, onda bi sve hodilo dobro. Industrija, gospodarstvo, ekonomija, poljoprivreda, prerada, onda kultura, znanost, da ne govorimo politika.

Završavan i ponavjan; Tuđman se od tri savjetnika bi opasa su dvojicon sa Korčule Šeparovićen i Nobilon, a ovi danas na čelu sa Milanovićon Linićon i Čačićon su nami Korčulanima rekli tenkju veri mač.

Slobodan Suncobran, 24. ožujka 2012.